Jeneraal Maxamed Nuur Galaal oo sheegay inuu Ahlu Suna kala talinayo dhinaca militeriga
Jeneraal Maxamed Nuur Galaal oo ka mid ah saraakiishii ciidankii qaranka Soomaaliyeed ayaa sheegay inuu kooxda Ahlu Sula ku biirinayo khibrad dhinaca Militeriga ah.
Jeneraal Maxamed Nuur Galaal oo hada ku sugan degmada Guriceel ayaa voa-da u sheegay inuu halkaas u tagay sidii uu uga qeyb qaadan lahaa dagaalka kooxda Ahlu Suna kula jirto xarakada Shabaabul Mujaahidiin, wuxuuna intaas ku daray in sidoo kale ay doonayaan in maamul heer degmo ah ay u sameeyaan deegaanada ay ka taliyaan Ahlu Suna, sida uu sheegay.
Maxamed Nuur Galaal ayaa sheegay in safarka uu ku joogo degmada Guriceel ay ku wehliyaan laba nin oo aqoonyahano ah, kuwaasoo shaqadoodu tahay maamul u sameynta degmooyinka ay gacanta ku hayaan Ahlu Suna, sida uu sheegay.
Jeneraalka ayaa intaas ku daray inuu xiriir fiican la leeyahay kooxda Ahlu Suna, isla markaasna uu si buuxda uga qeyb qaadanayo dagaalka ay kula jiraan kooxaha kale ee Islaamiyiinta ah.
Dhinaca kale Jeneraal Galaal ayaa ka gaabsaday inuu isagu wax lug ah ku leeyahay, xiriir ka dhexeeya Ahlu Suna iyo Itoobiya, balse wuxuu ku adkeystay in ayan waxba ku jabneyn in labadaas dhinac iska kaashadaan dagaalka ay kula jiraan kooxda Al-Shabaab.
Arintan ayaa waxa ay ku soo beegmeysaa xili abaabulo dagaal oo xoog leh ay ka soconayaan gobolada dhexe ee dalka, iyadoo dad badanna ay saadaalinayaan in dagaal kala bax ah uu ka dhici karo halkaas.
Xafiiska wararka Somalireal
Fikradaada ku darso.